Sa pagpanaw ni Pang. Cory Aquino muli na namang nagkaisa ang sambayanang Pilipino. Hindi maisasaisangtabi ang kontribusyon niya sa ating bansa at sa buong mundo bilang isang tunay na simbolo ng demokrasya , huwaran sa katapatan at moralidad bilang isang pinuno. Nawa ay hindi sumama sa hukay ni Cory ang diwa ng demokrasya na muli nyang ibinalik sa ating bansa. Ang init ng damdamin na nadarama ng bawat Pilipinong nagmamahal sa kanyang bayan sa pagkamatay ni Cory ay sana ay magpatuloy at hindi maglahong parang bula sa mga susunod na araw. Muli sanang gisingin nito ang isip ng maraming Pilipino na patuloy parin nagpapaalipin sa kamay ng mga magnanakaw at mapanglinlang na pinuno ng ating bayan.
Isang magandang tula na nilikha ng aking tiyuhin para kay Cory:
SALAMAT TITA CORY
I
Salamat Tita Cory, ang Pangulong magiting!
At ang demokrasya sa bansa ay muling dumating
At sa iyong pamumuno ang pag-asa’y umigting
Na ang kalayaan at pagsulong atin nang marating
Salamat Tita Cory sa pagbabalik ng demokrasya!
At sa ating bansa’y nanumbalik ang hustisya
Nang ika’y naging Pangulo lahat naging masaya
At ang buhay ng Pilipino muli ay lumigaya
Salamat Tita Cory sa iyong magandang pananaw!
Na ang pagiging Pilipino ay dapat malinaw
Sapagkat sa marami matagal itong pumanaw
Pagmamarangal ng lahi muli nang tinatanaw
Salamat Tita Cory, sa iyong magandang ehemplo!
Nang sa paghawak sa poder tunay kang modelo
Sa paninindigan sa katapatan isa kang simbolo
Pamumunong maka-Diyos, iyong marangal na istilo
Salamat Tita Cory sa pagiging mababang-loob!
At sana’y pamarisan ka ng pulitikang wala sa loob
Ang pamumuno sa bansa na tila utang na loob
Ng mga taong bayan, masasama ang loob.
Salamt Tita Cory, sa hindi mo pagnanakaw!
At di ka gumaya sa kasakimang di mapukaw
Ang pinakamatinong Pangulo’y natatanging ikaw
Kung baga sa kalawakan isa kang bulalakaw
Salamat Tita Cory sa mga tunay na pagbabago!
Na iyong iminulat sa ating bansang ginago
Ng mga gahaman, sakim at mga berdugo
Mga nanumbalik sa poder di pa rin nagbabago
II
Subalit Tita Cory, sa iyong pag-panaw, pag-alis
Ang mga mabuting ipinunla baka biglang mawalis
Ng mga pinunong pumalit, sa dayaang mabilis
At sa pwesto nagyo’y ayaw na yatang magsi-alis
Sana Tita Cory sa pag-akyat mo sa langit
Ang ating Panginoon sana ay magngit-ngit
At alisin na sa Pilipinas ang mga taong suwangit
Mga pinunong ang gawa, sa tingin mo ay pangit
Ang aking panalangin, mahal kong Pangulo
Ang bayang iniwanan mo hindi magiging magulo
Sa kamay ng mga pulitikong malalaki na ang ulo
Mga walang namang ginawa pagdating na sa dulo
Ang aking inaasam o Pangulong minamahal
Na ang ala-alang iniwan mo ay laging itatanghal
Ng lahat ng Pilipinong sa Bayan may pagmamahal
At ang Pilipinas, muling ibangon, sa mundo’y itanghal
Salamat natatanging Pangulo, aming Tita Cory
Salamat simbolo ng katarungan, aming Tita Cory
Salamat modelong Pinuno, aming Tita Cory
Paalam Ina ng Bayan, Aming Tita Cory
by :YAFUIBANAG
(Floro R. Francisco)
