AKIHABARA RAMPAGE
Lunes na ng umaga ko nalaman sa balita ang pangyayaring ito. Nakakagulat sapagkat paminsanminsan ay nagagawi rin ako sa lugar na iyon upang magcanvass o kaya'y mamili ng mga piyesa ng computer. Sadyang napakaraming tao ang naglalakad sa lugar na iyon kung kayat di katakataka na nakapatay agad ng 7 at nakasugat ng 10 tao ang suspek sa isang iglap lamang. Medyo nakakapagtaka lang na nagawa pa nga nyang makapanaksak ng ganoong karaming tao na di agad namalayan ng iba pang nakapaligid doon. Dahil kung sa Pilipinas nangyari ito ay ewan ko kung maka 2 pa sya ng saksak dahil siguradong dudumugin na agad sya ng mga taumbayan. Kung di pa tinutukan ng baril ng pulis ay di pa titigil sa pananaksak ang suspek.
Ayon sa pulisya ay planado daw ang naging hakbang ng suspek mula sa pagkakarenta ng trak galing Shizuoka hanggang pagbyahe nito ng Akihabara. Ipinost pa nga raw ng suspek ang kanyang gagawin sa isang mobile blogging website sa internet.
Sa pangyayaring ito ay parang nabahiran na rin ang imahe ng Akihabara na mas kilala sa pagiging Electronics District sa Tokyo. Kahit papaano ay may maiiwang takot na rin sa mga tao na magpagalagala doon dahil baka maulit na naman ang walang saysay na pagpatay na ito.
Kung titignan natin ay parang kinokopya ang mga krimen na sunod-sunod na napapabalita. Nitong taon lang na ito kung ating matatandaan ay may nabalita na ring maramihang panananaksak sa isang shopping center sa Shinagawa at sa train station sa Iberaki. Kung nagiging uso kamakailan ang pagpapakamatay na gamit ang hydrogen sulfide, ito ba ang bagong trend naman na tinatahak ng mga Hapong galit sa mundo at sa sosyedad?
No comments:
Post a Comment