RECESSION NA RIN SA JAPAN

Technically tinatawag na recession ang isang ekonomiya kapag dalawang magkasunod na buwan na di umusad ito batay sa panukat ng GDP o Gross Domestic Product. Ayon sa balita nag negative growth na nga raw etong taong 2008 at ang forecast pa nila ay zero growth sa taong 2009.

Para sa katulad kong isang foreign worker nakakatakot ang ganitong mga balita. Lalo na pag naririnig mo pa na kabi-kabilang kumpanya na rin dito sa Japan ang nagaapply ng loan sa gubyerno para maisalba ang napipintong pagbagsak. Anjan pa ang mga balitang lay-off ng mga trabahador sa malalaking kumpanya lalong lalo na sa larangan ng manufacturing. Sabihin ko nang hindi pa naman ganoong kaapektado ang kumpanya namin na ang linya ay nasa larangan ng plant engineering and construction, pero worst case scenario magiging priority pa rin ang mga lokal na manggagawa kesa sa katulad kong isang dayuhan. Kaya nga nakakatakot maging waldas sa pera ngayong mga panahong ito.

Parang nagkatotoo yata ang panalangin ng maraming mga kababayan natin rito na tumaas ang value ng yen. Dahil sa kasalukuyan ay nasa ¥92 lang ang $1 at ¥0.51 ang ₱1 . Pabor para sa mga remittance natin buwan buwan sa Pinas, dahil ang isang lapad natin ay katumbas na agad ng 5100 pesos. Pero in the long run ay di raw ito maganda sa ekonomiya ng Japan. Dahil kapag lumalakas ang yen laban sa halaga ng dollar nangangahulugan daw itong mas mahinang kita para sa isang exporting country na kagaya ng Japan.

Kitang kita ang interdependency ng mga ekonomiya sa buong mundo. Nagsimula lang naman ang prublema ng humina at nagrecession ang US. Pagkatapos nito ay nagsunuran na ang pagbagsak ng stocks sa ibat ibang bansa kaalinsabay ng pagkalugi na ng maraming mga malalaking kumpanya.

Ayon sa mga experto, ang kasalukuyang pandaigdigang prublemang ito ay higit na magiging malubha kumpara sa naging economic slump noong simula ng milenyo. Sana naman ay di maging malalim ang patutunguhan ng pandaigdigan recession na ito.

Sa ganitong mga pagkakataon ay kinakailangan talaga ang ibayong pagtitipid at matalinong paggamit ng pera.