♨ONSEN♨

Nakasama ako kamakailan sa riyoku o company outing sa Hakone. Sikat ang hakone dahil sa mga onsen o hotspring nito. Ito ang malimit na puntahan ng mga Hapon upang makaiwas pansamantala sa maingay at mabilis na buhay sa syudad. Lugar ito para mag-relax at magenjoy. Ito ang aking unang pagkakataon na mag-onsen. Medyo na culture shock ako nung una sapagkat pagpasok namin sa onsen ay walang kimi ang mga tao dun na magtanggal ng lahat ng saplot sa katawan. Medyo ilang pa nga ako nung una pero inisip ko na mas mukhang nakakahiya ata kung ako lang ang di magtatanggal ng saplot doon. Tanging naiwan lang sa akin ay ang kapirasong bimpo na nilagay ko na lang sa ibabaw ng ulo ko ng lumusong na ko sa pool ng mainit na tubig. Wala namang pinagkaiba sa mga hot springs natin sa Pansol Laguna. Dito nga lang ay mga hubad na kaluluwa ang makikita mo kahit saan ka lumingon. Sayang nga lang at magkakasama lang ang lahat ng lalaki at ganun rin ang mga babae. Ayon sa aking kasamahang Hapon ay may simbolismo raw ang pagiging hubad ng lahat ng tao rito. Ito ay upang matanggal ang lahat ng mga barriers sa magkakasama at maging kumportable sa isat isa. Sabagay makasabay mo nga naman ang presidente ng kompanya nyo na naglalakad ng hubot hubad parang ang feeling ay pantay lang kayo hehehe. Napansin ko rin na tahimik ang paligid bihira ang naguusap , kung meron man ay pauntunti lang. Mayroon mga patakarang sinusunod sa loob ng onsen. Bukod sa ang lahat ay nakahubad, dapat ring magbanlaw bago at pagkatapos gumamit ng onsen. Marahil ay kasama na rin sa mga patakarang iyon ang pagpapanatili ng katahimikan . Parang maluluto ang yagballs ko ng lumusong ako , pero habang tumatagal ay nakakarelax na sya sa katawan. ang sarap ng pakiramdam. Parang minamasahe ang buo kogng katawan. Subalit pag matagal na babaran nakakasakit ng ulo ang sobrang init. Siguro ay mga 15 mins lang ako nakapagbabad at umahon na rin agad ako para magbanlaw. Mababa kasi ang tolerance ko sa sobrang mainit. pagkatapos nun ay nakabihis na kami lahat ng yukata o bathrobe para kumain ng hapunan. Hanggang kinabukasan ay ito na ang naging suot namin. Masarap ang naging hapunan namin . Di ko na nga alam kung ano mga tawag doon basta lafang na lang ng lafang. Isang tradisyon rin ito sa mga nagririyoku na magkainan at maginuman pagkatapos mag onsen. Akala ko nga ay pagkatapos ng hapunan ay
tulugan na . Lumipat pa kami ng kwarto para sa karaoke at drink-till-drop sessions naman. Masaya sapagkat yung mga kaopisina ko na napakapopormal pag nagtratrabaho ay makikitaan mo ng lighter side nila. Ang katunayan nga para silang mga sinasapian ng demonyo pag nakakainom may nahulog sa upuan may nananadyak may nanghihipo ng ka-table na babae at may nagrock n roll pa. Karamihan sa mga hapon na kasamahan namin ay di na natulog hanggang umaga. Nagawa ko pa makaligo ulit sa onsen kinaumagahan pagkagising. Sa pagkakataong iyon ay medyo di na ko naiilang maglalakad ng hubo. Marami pang maaring mapuntahan sa paligid nito tulad na lamang ang pagdaan sa malapit sa bunganga ng bulkan sakay ng cable car subalit kinapos na rin sa oras. Sana ay makabalilk pa ulit ako sa lugar na iyon sa ibang pagkakataon.