BILOG PROFILE

Bilog #1 - Lalake. Mid-20s ang edad. Nakapunta sa Japan dahil sa imbitasyon ng kanyang ate. Subalit yun ay tatlong taon na ang nakakalipas. Ngayon ay isa na siyang certified bilog. Nagtatrabaho siya sa construction. Mabibigat na trabaho ang pinasukan niya. Dati ay kargador at tagatiktik ng kalawang sa pier. Ngayon ay taga-giba ng bahay ang trabaho niya . Maswerte sya at kakilala ng kapatid niya ang naging amo nya kaya natanggap pa rin kahit bawal na. May asawa at tatlong maliliit pang anak sa Pinas kung kayat ayaw pang umuwi.
Bilog #2 - Babae. Nasa 20's. Dating talento sa omise at ng nagexpire na ang bala nya ay tumakbo na sa ibang lugar para mag-bilog. Doon ay pareho pa rin ang trabaho niya subalit pili na lang ang mga omise na natanggap sa kanya dahil bawal na rin ang mga bilog sa omise. May pinagaaral na kolehiyo sa Pilipinas at mataas ang pangarap kung kayat kapit sa patalim na. Naghahanap ng customer na Hapon na gusto siyang pakasalan kahit imitatiton lang para magkaroon ng bala.
Bilog #3 - lalake. nasa mid-40's na. Kung anu-ano na rin ang naging trabaho pero ngayon sya ay isang pintor. May asawang Filipina rito at bilog rin. Nasa 8 gulang na ang kanilang anak at pinagaaral nila sa eskwelahan dito. Ayaw umuwi dahil sa hirap ng buhay pagdating sa Pilipinas. Nahihiya rin dahil sa tagal niyang nilagi rito sa Japan ay wala gaano naipundar.
Bilog #4 - Babae. Nasa mid 30's ang edad. Nagtatrabaho sa mall sa umaga, at sa gabi naman ay sa isang omise. Hindi siya bilog dahil may ipinapakita siyang bala. Yun nga lang ay iba ang pangalan. Nabili lang niya ito nung nagexpire na ang kanyang bala. Hindi siya makauwi dahil natatakot siya na baka ma-check ang visa niya kung sakaling nandito pa sa Japan ang ginagamit niyang pangalan. Dalawang anak ang pinagaaral niya sa Pilipinas.
Bilog#5 - Lalake. Nasa 20's ang edad. Dating crew sa barko, ngayon ay bilog na dahil nag jump-ship mahigit limang taon na ang nakakalipas. Ayaw pa umuwi dahil baon daw sa utang sa Pinas. Apat ang anak sa dalawang babae. Iba't-ibang trabaho na rin ang napasukan. kagaya ng paghohosto. Sa kasalukuyan siya ay nagtratrabaho sa construction.

Ang mga bilog na nabanggit ay di kathang isip lang. Bagkus ay mga tunay na tao na nakasalamuha ko sa apat na taon kong pananatili rito sa Japan. Iba't-iba ang kanilang kwento pero parepareho ang layunin na maiahon ang mga mahal sa buhay. Marami pa akong nakasalamuhang bilog pero halos kapareho na rin ng mga nabanggit ko ang kanilang kwento.

Sa ngayon ay parami na ng parami ang napapauwing mga kababayan natin na bilog. Ito ay dahil sa mas pinagibayong kampanya ng pamahalaang Hapon na linisin ang kanilang bansa ng mga ilegal na dayuhan.Sinimulan ito nung isang taon ng ipatupad ang mas mahigpit na regulasyon sa pagpasok at paglabas sa airport pa lamang. Dahil dito ay paliit na ng paliit ang mundong ginagalawan ng mga bilog. Ang mundo ay bilog. Pero para yatang ayaw na sa mga bilog ng mundong ginagalawan ko dito sa Japan.

Si Bilog#1 at 5 ay nahuli na yata ayon sa aking narinig. Naging mali ang kanilang pamamaraan subalit hinahangaan ko pa rin sila dahil sa kanilang pagmamahal sa kanilang pamilya.