GOKUSEN

Isa itong sikat na teledrama sa Japan. Ito ay hango sa manga at noong 2002 lamang naisalin sa isang dramang pang-telebisyon. Sa ngayon ay pinapalabas na ang ikatlong season nito sa telebisyon. Matagal ko ng naririnig ang palabas na ito pero parang di ako nagkainteres dahil ayon sa aking mga nabasa ay parang rip-off lang daw ito ng isa pang naunang sumikat na palabas, ang GTO. Ng minsan ay nakapanood ako ng isang episode sa internet ay para bang nahigop ako ng napakalakas na magnet at di na ko naalis sa pagkakaupo hanggang di natatapos ang isang season.

Tungkol ito sa isang baguhang babaeng guro na mas kilala sa kanyang mga estudyante bilang si Yankumi. Sa mata ng kanyang mga estudyante siya ay isa lamang pangkaraniwang guro, mahina, at kinakayakaya lang nila. Subalit di nila alam na sa labas ng paaralan ay may ibang pagkatao si Yankumi. Siya ang magiging 4th generation lider ng Oedo, isang sikat na Yakuza family. Noong 7 taong gulang pa lamang sya ay namatay na ang kanyang mga magulang kung kayat nanirahan sya sa kanyang lolo na syang 3rd generation lider ng Oedo. Dito na sya lumaki at natutong makipaglaban. Subalit hindi nya pinili na sundan ang yapak ng kanyang lolo bilang pinuno, sa halip ay pumasok sya bilang guro tulad ng pangarap ng kanyang ama. Bilang guro ay pinilit nyang itago ang kanyang pagkatao at kunin ang tiwala ng kanyang mga estudyante. Sya ang naging homeroom teacher ng kinakatakutang section sa kanilang paaralan . Pinakita nya sa mga ito na maari pang pagkatiwalaan ang mga guro tulad nya at desidido sya na mapapagraduate nya lahat ang mga ito.

Kung tutuusin ay di ganoong kalaliman ang kwento dahil very predictable na nga ang mangyayari. Sa buong season 1 at 2 na aking napanood ay laging may pattern ang takbo ng kwento. Una ay walang tiwala ang estudyante nya sa kanya. Pagkatapos ay masasangkot ang estudyante nya sa isang kaguluhan pangkaraniwan ay sa bugbugan. Sabay dadating si Yankumi with matching musical score, para iligtas ang estudyante. Sa huli ay makukuha na nya ang loob ng estudyante dahil sa kanyang mga pangaral. Ganoonog ka-predictable ang kwento subalit sa kahabaan ng panood ay nakakapagtaka na very entertaining pa rin sya at maraming beses ay natatawa at mangiyak-ngiyak ako sa mga eksena. Magaan sa pakiramdam ang panonood nito dahil bukod sa nakakaaliw ay mayroon syang iniiwan na mahalagang aral sa bawat episode. Isa pa ay nakakatuwa ang karakter ni Yankumi na para bang pinaghalu-halong karakter sa isang pagkatao. Sa isang pagkakataon ay very tough ang dating nya lalo na kapag nakikipaglaban at sa isang iglap naman ay nalabas yung kanyang soft side bilang babae na nagkaka-crush rin at bilang isang maaalahaning guro sa kanyang mga estudyante. Personally ay
nakakatuwa ring makita si Yuki Nakama ang syang gumanap ng karakter ni Yankumi dahil parang nabubura sa isip ko yung pagkakatypecast nya sa karakter ni Sadako sa The Ring. Naiwan rin sa isip ko yung laging binabanggit ni Yankumi bago pumasok sa classroom...FIGHT-OH!!! na para bang boxing match ang papasukan at hindi isang classroom.

Para sa akin ang isang magandang napulot ko sa panonood nito ay ung katotohanan na hindi tayo dapat humuhusga sa ibang tao batay sa panlabas na ating nakikita o sa mga bagay na sinasabi lang ng ibang tao tungkol sa kanila. Dapat ay lagi nating hinahanap at inaappreciate yung mas magandang bahagi ng kanilang pagkatao.