PALITAW

Isang taon na mahigit ang nakalipas simula ng huli akong sumulat sa blog na ito. Ewan ko ba kung bakit nawalan na ako ng gana na magsulat. Nung una ay inilaan ko ang personal blog na ito para maging lalagyan ng mga pangaraw-araw na saloobin, kurokuro, kathang isip, at kung anu-anong walang kabuluhang mga naiisip ko. Maraming mga araw na ang lumipas at marami na rin ang mga dapat kung naisulat rito subalit nabigo akong gawin yun. Maraming kadahilanan kung tutuusin. Isa na ay si KATAMARAN. inuunahan na nya ako bago ko pa man maisipan buksan ang aking laptop at magsulat. Minsan kasi bago matulog sa gabi ay naglalakbay ang aking imahinasyon at kung anuanong mga bagay ang naiisip ko na gusto ko sana isulat sa blog pero nauunahan ako ni katamaran. Pangalawa ay si PAGOD. Maghapong trabaho at mga extra curricular activities sa gabi ang siguradong nandiyan si PAGOD. Makapangyarihan si PAGOD, para kang ni-knock out ni Pacquiao pag tumama. Minsan sa gabi ay active pa ang isip ko pero di na kaya ng katawan ko ang pagod. Inuunahan na ako ng antok sa sobrang pagod bago ko pa maisipan magsulat. Nakakapanghinayang talaga dahil marami ang nabago sa buhay ko ang napalagpas kong isulat sa blog na ito. Pinakamabigat na dahilan siguro ay ang pagkawala ni ENTHUSIASM...ewan ko ba sumama na yata sa milyong Pinoy na nagabroad. Isang bagay na mahirap ipaliwanag . Siguro ay parte na rin ng ugali ko na mabilis magsawa sa mga bagaybagay...Pero sa bagay sabi nga nila huli man at magaling ay magaling pa rin hehehe. Magaling kung maihahabol ko pa. Paunti unti ay pipilitin kung magsulat muli. Sa tingin ko ay kailangan ko rin tong gawin sapagkat kinakalawang na yata ako sa kakaisip sa mga Nihongo characters na pinapamemorize sa min ni sensei. Magiging magandang ehersisyo ang pagsusulat para ikondisyon ang aking isip.
Teka, napansin ko lang para yatang palitaw ang pagsusulat ko rito sa blog na ito. Lulubog lilitaw. May panahong ang sipag sipag ko magsulat at sunod sunod ang aking entries tapos isang mahabang hiatus na naman ang kasunod. Nagutom tuloy ako namis ko ang palitaw.